Sicela uqaphele lokhu: Le migomo kanye nemibandela iyatholakala
ngesiBhunu, ngesiNgisi, Sesotho kanye nesiXhosa, uma wenza isicelo
sokuthi uthunyelelwe yona ngolimi olufunayo. Shayela le nombolo 0861 466324.

ISIVUMELWANO SOKUTHENGA NGESIKWELETI sokuthengiselana ngohlelo lokukhokha ngamancozuncozu NgokweSigaba 93(2) soMthetho Kazwelonke Wezikweleti 34 ka 2005

Esiphakathi kwabakwa-HomeChoice (Pty) Ltd,
Inombolo ye-NCR: NCRCP 454
78 Main Road, Wynberg, 7800, Inombolo yocingo: 0861 466324

Kanye

Nekhasimende, njengoba libhaliwe emhlane wale ncwajana (Kwi-invoyisi
yentela/kwiSivumelwano esandulela isivumelwano soqobo kanye neKhwotheshini.)

Le migomo uma ifundwa nefomu lokufaka i-oda, iSivumelwano esandulela isivumelwano soqobo kanye neKhwotheshini/I-invoyisi yentela, incwajana yokudiliva, izitalimende ezithunyelwa nyanga zonke kanye nesiphakamiso sokuthengiselana (lokhu kufaka phakathi zonke izimiso zekhathalogi (ibhuku lezimpahla ezidayisayo) yabakwa-HomeChoice kanye nezinye izincwadi zokukhangisa eziqukethe isiphakamiso sokuthenga esincike kwimigomo kanye nentengo yezimpahla kufaka phakathi konke ukuxhumana okwenziwe ngokushayelana ucingo)  ("isiphakamiso sokuthengiselana"), kwenza isivumelwano ("isivumelwano") abakwa-HomeChoice (Pty) Limited ("HomeChoice"), abadayisa ngaphansi kwaso izimpahla ("izimpahla") njengoba zichaziwe kwikhathalogi yabakwa-HomeChoice bezidayisela iKhasimende ("iKhasimende") okubhalwe amagama alo kanye nekheli kwifomu loku-oda izimpahla elibuyiselwe kwabakwa-HomeCoice ngenkathi kufakwa i-oda lezimpahla ("Ifomu loku-oda") noma, kwiSivumelwano esandulela isivumelwano soqobo kanye neKhwotheshini/I-Invoyisi yentela, uma i-oda lenziwe ngokushaya ucingo. IKhasimende lisayinda futhi lamukele le migomo esikhaleni esihlinzekiwe noma lokho kwenziwe ocingweni uma i-oda lifakwe ngocingo noma kwincwajana yokudiliva esayindwa yiKhasimende ngenkathi lamukela izimpahla (incwajana yokudiliva). Uma kwenzeka iKhasimende lingazisayindeli le migomo lona ngokwalo; umuntu ozolisayindela uzothathwa njengomuntu ogunyaziwe ukuthi asayindele iKhasimende, ngaphandle uma iKhasimende liziphindisela emuva izimpahla kungakapheli izinsuku eziyi-14 (ishumi nane) emva kokuthunyelwa kwezimpahla kulona. Ukwahluleka ukusayinda akusho ukuthi iKhasimende alizamukelanga izimpahla futhi/noma aliyamukelanga imigomo elinikezwe ngaphansi kwayo isikweleti ngabakwa-Homechoice IKhasimende kumele likhombise ukungazamukeli kwalo izimpahla ngokuthi liziphindisele emuva njengoba kuchaziwe emshwaneni 1.3 ngezansi.

1. Isikhathi sokwamukela izimpahla
1.1 Ngaphambi kokuphothulwa kophenyo oluzokwenziwa ngabakwa-HomeChoice ukuthi iKhasimende lizovunyelwa ukuthenga ngamalini, akukho okuzophoqelela abakwa-HomeChoice ukuthi balinikeze iKhasimende izimpahla. Uma abakwa-HomeChoice belivulela isikweleti iKhasimende futhi bevuma ukulidayisela izimpahla, bazozithumela kulona iKhasimende futhi uma lithanda lingazamukela noma lingazamukeli izimpahla njengoba kubhaliwe kwimishwana 1.2 kanye no 1.3 ngezansi.
1.2 Zonke izimpahla ezidayiselwe iKhasimende ngabakwa-HomeChoice zizoncika ekutheni iKhasimende liyazamukela yini noma cha. IKhasimende linikezwa izinsuku eziyi-14 (ishumi nane) kusukela ngosuku okufinyelele ngalo izimpahla kulona, ukuthi lizihlole izimpahla futhi uma lingagculisekile ngazo ngenxa yanoma isiphi isizathu,kumele liziphindisele emuva izimpahla ngokomshwana 1.3 ngezansi, futhi emva kwalokho sizoqedwa isivumelwano sokuthenga ngesikweleti. Uma iKhasimende lingaziphindiseli izimpahla kwabakwa-HomeChoice kungakapheli izinsuku eziyi-14 (ishumi nane) emva kokuzithola, kuzothathwa ngendlela engenakuphikiswa ukuthi ikhasimende liqoke ukuzithenga izimpahla.
1.3 IKhasimende kumele liziphindisele emuva izimpahla kwabakwa-HomeChoice kanye nencwajana yohlu lwezinto ebezithunyelwe kulona, futhi kumele ziphindiselwe emuva ngebhokisi lazo ebezithunyelwe ngalo, futhi uma kwenzeka, kumele zithunyelwe ngeposi elinomshwalense. Zonke izimpahla ezibuyiselwa emuva kumele zithunyelwe kuleli kheli HOMECHOICE, PRIVATE BAG X28, CAPEMAIL, 8003. ZONKE IZIMPAHLA OTHUNYELELWE ZONA KUMELE ZIPHINDISELWE EMUVA (KUFAKA PHAKATHI NEZIPHO).

2. Izindlela zokukhokha
IKhasimende kumele likhokhele izimpahla ngemali engukheshe noma ngohlelo lokukhokha ngamancozuncozu olujwayelekile olunikezwa ngabakwa-HomeChoice, futhi indlela yokukhokha ezosetshenziswa kuzoba ngenye yezindlela ezikhonjiswe kwisiphakamiso sokuthengiselana. Ukunikeza kwabakwa-HomeChoice isikweleti esinjalo kuzoya ngokubona kwabo.

3. Ukukhokha ngamancozuncozu
3.1 Uma kwenzeka abakwa-HomeChoice belivulela isikweleti iKhasimende, kumele likhokhe isamba semali enqunyiwe nyangazonke kanye nenani elibekiwe lezitalimende njengoba kubhaliwe kwiSivumelwano Esandulela Isivumelwano Soqobo kanye nakwiKhwotheshini/I-invoyisi yentela. Leyo mali eseliyikhokhile iKhasimende, kuhlangene nezindleko zokuthenga ngesikweleti ezengeziwe kuleyo mali kanye nanoma iyiphi enye imali ekweletwa yiKhasimende, kuzokhonjiswa kwisitatimende esithunyelwa nyangazonke.
3.2 Yonke imali ekhokhiwe izokwabiwa ngendlela yokuthi okokuqala izokhokhela inzalo, bese ikhokhela izindleko zomthetho noma zokuqoqwa kwesikweleti kanye nezindleko okungenwe kuzona ngenkathi kuthathwa izinyathelo zokuqinisekisa ukulandelwa kwalezi zimiso zesivumelwano mayelana nanoma yiziphi izimpahla ezidayiselwe umthengi, bese emva kwalokho kukhokhelwa imali esasele esikweletini esiyinhloko.
3.3 Isitifiketi esikhishiwe futhi sasayindwa ngomunye wabaqondisi bakwa-HomeChoice esikhombisa imali ekweletwa yiKhasimende siyiqiniso elingephikiswe futhi singasetshenziswa ukweseka nanoma isiphi isicelo esifakwa enkantolo noma izinyathelo zomthetho.

4. Isheduli yokukhokha kanye nemali okumele ikhokhwe
4.1 Ukuze uthole isheduli yokukhokha, ekhombisa isikweleti esinikeziwe, nokuthi kumele zikhokhwe emva kwesikhathi esingakanani izitalimende, kanye nenani lezitalimende okumele zikhokhwe kanye nezinsuku zokukhokhwa kwesitalimende sokuqala kanye nesokugcina, bheka lokho okubhalwe emhlane wale ncwajana (iSivumelwano esandulela isivumelwano soqobo kanye neKhwotheshini/I-invoyisi yentela.)
4.2 Isitalimende sokuqala okumele sikhokhwe yiKhasimende kumele sikhokhwe ngosuku olukhonjiswe kwiSivumelwano esandulela isivumelwano soqobo kanye neKhwotheshini/I-invoyisi yentela (bheka emhlane wale ncwajana) noma ngaphambi kwalolo suku oluzoba ' Usuku lokukhokhwa kwesitalimende sokuqala'.
4.3 Ngokuya kwezimiso zoMthetho, ukwahluleka kweKhasimende ukukhokha nanoma isiphi isitalimende/izitalimende ngosuku olunqunyiwe kuzonikeza abakwa-HomeChoice ilungelo lokufuna ukuthi kukhokhwe yonke imali esasele okuthengwe ngayo izimpahla ngaphandle kokunikeza iKhasimende esinye isaziso.

5. Imali yezindleko zokulawulwa kokwahluleka ukukhokha isikweleti ngesikhathi esinqunyiwe
5.1. Uma kwenzeka iKhasimende lisalela emuva ekukhokheni kwalo izitalimende zalo ezikhokhwa njalo ngenyanga futhi uma abakwa-HomeChoice benquma ukuthatha izinyathelo zokuphoqelela ukulandelwa kwesivumelwano ngokwemigomo yoMthetho, iKhasimende yilona elizokhokha imali yezindleko zokulawulwa kokwahluleka ukukhokha isikweleti ngesikhathi esinqunyiwe kanye nezindleko zokuqoqwa kwesikweleti abangene kuzona abakwa-HomeChoice, kufaka phakathi imali yezindleko zokulandela umkhondo weKhasimende, ikhomishini yokuqoqwa kwesikweleti, izindleko zabameli kanye nanoma iziphi ezinye izindleko abangene kuzona abakwa-HomeChoice ngezinyathelo abazithathile zokuqinisekisa ukulandelwa kwesivumelwano (ezifana nezindleko zokushaya ucingo kanye nokubhala izincwadi), ngokwezimiso zoMthetho.
5.2. Abakwa-HomeChoice ngeke baqoqe noma bazame ukuqoqa nanoma iyiphi imali yezindleko ezingaphezu kwezindleko ezivumelekile ngokoMthetho Wezinkantolo Zezimantshi Nombolo 32 ka 1944, uMthetho Wenkantolo Enkulu YamaJaji Nombolo 59 ka 1959 noma uMthetho Wabaqoqi Bezikweleti Nombolo 114 ka 1998.

6. Ukudilivwa kwezimpahla, ubunini bempahla kanye nobungozi
Ngokuya kuka 1.2 ngenhla, ubunini bempahla buzodlulela kwiKhasimende ngokushesha uma abakwa-HomeChoice sebethole ingxenye yemali eyintengo yempahla, futhi iKhasimende akudingekile ukuthi lihlinzeke abakwa-HomeChoice nanganoma nhloboni yesibambiso sokuvikela imali ekweletwa yiKhasimende kwabakwa-HomeChoice ngezikhathi ezithile ngokwalesi sivumelwano. Ubungozi obuphathelene nezimpahla buzodlulela kwiKhasimende uma sezifikile kulona izimpahla elizithengile. Ngaphandle uma kuvezwa ubufakazi obuphikisana nalokho, incwajana yokudiliva izoba ubufakazi bokudilivwa kwezimpahla

7. Igaranti
7.1 Igaranti yezimpahla (imininingwane yayo etholakala kwikhathalogi yabakwa-HomeChoice) enikezwa ngabakwa-HomeChoice inikezwa ngaphezu kwamanye amawaranti noma amagaranti ashiwo ngumthetho. Azikho ezinye izicelo zokukhokhelwa ezizofakwa yiKhasimende ngaphezu kwalokho.
7.2 IKhasimende kumele libikele abakwa-Homechoice mayelana nezimpahla eziphukile noma ezishodayo ngokubathumelela isaziso esibhalwe phansi okumele sifinyelele kwabakwa-HomeChoice zingakapheli izinsuku eziyi-14 (ishumi nane) emva kokuthola kweKhasimende izimpahla. Ukwahluleka ukwenza lokho kusho ukuvuma ukuthi izimpahla ezifikile kwiKhasimende ziphelele futhi zisesimweni esihle.
7.3 Nakuba kukhona umshwana 7.2, abakwa-HomeChoice (imininingwane yayo etholakala kwikhathalogi yabakwa-HomeChoice) bayabuvikela ubungozi obuphathelene nokuntshontshwa kwezimpahla ekhaya leKhasimende, ukulimala kwezimphahla ngenxa yokushiswa ngumlilo, noma ukucekelwa phansi kwezimpahla ngenxa yenhlekelele yemvelo, uma kungasalelanga ukukhokhela kweKhasimende isikweleti futhi uma iKhasimende lingakafaki izicelo zokukhokhelwa ezingaphezu kwezimbili ngalezo zimpahla elizithengile. Uma izimpahla zilahleka noma zintshontshwa, zilimala noma zicekeleka phansi futhi uma kunesizathu esithile sokungakhishwa kwezinye izimpahla ezizovala isikhala salezo ezilahlekile, iKhasimende kumele liqhubeke nokukhokha imali esasele emalini okuthengwe ngayo izimpahla kuhlanganisa nanoma iyiphi enye imali ekumele ikhokhwe ngokwalesi sivumelwano.

8. Inzalo kanye nemali yezindleko
8.1 IKhasimende lizonikezwa Kwisivumelwano esandulela isivumelwano soqobo kanye nakwiKhwotheshini/I-invoyisi yentela imininingwane ephathelene nemali yezindleko zokuthenga ngesikweleti, Imali yokuvula isikweleti kanye nemali yezindleko zokudiliva izimpahla ngenjoba ibekwe nguMthetho. Izinga lenzalo yemali mboleko ngeke liguquguquke kuze kuphele isikhathi sesivumelwano futhi libalwa nsukuzonke bese lifakwa esikweletini njalo ngenyanga. Izinga lenzalo yemali mboleko ozokhokhiswa lona kuzoba izinga eliphelele elivumelekile ngokwemigomo yoMthetho (sicela ubheke ingxenye yemininingwane ekhasini elingaphambili le-invoyisi ukuze ubone izinga lenzalo yemali mboleko ozokhokhiswa lona).
8.2 Abakwa-HomeChoice banelungelo lokudonsa inzalo yanoma iyiphi imali abangakhokhelwanga yona ngosuku olunqunyiwe noma ngaphambi kwalo futhi leyo mali izohambelana nezinga lenzalo yemali mboleko elifanayo nalelo elizokhokhwa ngokwalesi sivumelwano, futhi leyo nzalo izobalwa kusukela ngosuku lokukhokha olunqunyiwe kuze kufike osukwini okuzokhokhwa ngalo imali esalele emuva ("inzalo yemali esalele emuva") .
8.3 Inzalo yemali esalele emuva (uma ikhona) , imali yezindleko zokuthenga ngesikweleti, Imali yezindleko zokuvula isikweleti kanye nemali yezindleko zokudiliva izimpahla kumele ikhokhwe kuzona zonke izimpahla ezidayiswe ngesikweleti futhi ibalwa ngendlela ehambelana nemigomo yoMthetho.
8.4 Kukhona futhi nemali ekhokhelwa ukusebenzisa isikweleti engu-R15 okumele ikhokhwe nyangazonke. Kungenzeka le mali ekhokhelwa ukusebenzisa isikweleti ikhuphuke njalo ngonyaka ngezinga elingekho ngaphezu kuka 10%. Isaziso esibhalwe phansi mayelana nalolu guquko sizothunyelwa kuwena esikhathini esiyizinsuku zokusebenza ezinhlanu (5) ngaphambi kokukhushulwa kwale mali.
8.5 Abakwa-HomeChoice bazokhokhisa umthengi imali ekhokhwa nyangazonke yokusebenzisa isikweleti njengoba ibhaliwe kwikhwotheshini. Ngokubona kwabo, abakwa-HomeChoice banelungelo lokuqoka ukungayikhokhisi ingxenye ethile yale mali yokusebenzisa isikweleti. Leso senzo sokungakhokhisi ingxenye ethile yemali yokusebenzisa isikweleti bangasiguqula noma nini abakwa-HomeChoice futhi isenzo sokungayikhokhisi le mali akumele senze iKhasimende licabange ukuthi ngeke bakwazi ukusihoxisa leso sinqumo sokungayikhokhisi le mali yokusebenzisa isikweleti noma ngeke bakwazi ukuguqula indlela okukhokhwa ngayo isamba esithile sale mali. Uma iKhasimende linezivumelwano zokuthenga ngesikweleti ezingaphezu kwesisodwa kwabakwa-HomeChoice, le mali ekhokhwa nyangazonke yokusebenzisa isikweleti izokhokhwa kuphela kuleso sivumelwano sokuthenga ngesikweleti esenziwe kamuva kunazo zonke ezinye.

9. Isibopho sokudalula indawo okuzogcinwa kuyona izimpahla
IKhasimende liyathembisa ukuthi lizobazisa ngokubabhalela incwadi abakwa-HomeChoice kungakapheli izinsuku zokusebenza eziyishumi (10) uma kwenzeka kubakhona uguquko oluthile mayelana nekheli lasekhaya, ikheli lendawo okugcinwe kuyona izimpahla ngokwalesi sivumelwano, kanye negama nekheli lanoma ngubani omunye umuntu okudluliselwe kuyena izimpahla. Lesi saziso singathunyelwa ngesandla, ngeposi elirejistiwe noma nge-imeyili. Kuyicala ukwahluleka kweKhasimende ukwazisa abakwa-HomeChoice mayelana nokuguquka kwemininingwane ephathelene nekheli lalo.

10. Ikheli okuzokwamukelwa kulona izincwadi
Amakheli abhalwe kwifomu loku-oda izimpahla kanye nakwisivumelwano esandulela isivumelwano soqobo nekhwotheshini yeKhasimende kanye nabakwa-HomeChoice kuzoba amakheli azosetshenziswa ukuthola usizo kanye nokuthumela zonke izaziso, izinhlelo zenqubo elandelwayo, izitatimende kanye nezinye izincwadi. IKhasimende kanye nabakwa-HomeChoice bayathembisa ukuthi bazokwazisana ngokubhalelana izincwadi ngokushesha uma kuguquka nanoma iliphi ikheli futhi lolu guquko luzoqala ukusebenza emva kwezinsuku eziyi-14 (ishumi nane) emva kokuthunyelwa kwesaziso. Lesi saziso singathunyelwa ngesandla, ngeposi elirejistiwe noma nge-imeyili.

11. Ulwazi oluphathelene nesiKweleti kanye nemikhawulo yesikweleti
IKhasimende liyavuma ukuthi abakwa-HomeChoice bangalubhalisa ulwazi oluphathelene nendlela elikhokhela ngayo i-akhawunti yalo kwizinkampani ezigcina ulwazi oluphathelene nokuthenga ngesikweleti ngaphandle kokwazisa iKhasimende. Ulwazi olunjalo lungasetshenziswa ngabakwa-HomeChoice kanye namanye amalunga ezinkampani ezigcina ulwazi oluphathelene nokuthenga ngesikweleti ukuze athathe izinqumo ezifanele mayelana neKhasimende kanye/noma amalunga omndeni walo, ukuze kuvinjelwe ukukhwabanisa kanye nokulekelela imizamo yokuthola umkhondo wabantu abakweletayo.

12. Ukuphulwa kwesivumelwano/Ilungelo labakwa-HomeChoice lokuqeda Isivumelwano
12.1 Uma kwenzeka iKhasimende:
12.1.1 lihluleka ukukhokha isitalimende ngesikhathi esinqunyiwe nanoma iyiphi enye imali okumele ikhokhwe ngokwalesi sivumelwano noma uma kuphulwa nanoma iyiphi imigomo yalesi sivumelwano; noma
12.1.2 selithathwa ngokusemthwethweni njengomuntu ohlulekayo ukukhokha izikweleti zakhe futhi linikezwa umlawuli ozolilawulela impahla yalo;
abakwa-HomeChoice bangalazisa ngokulibhalela incwadi iKhasimende mayelana nokwahluleka kwalo ukukhokha imali efunekayo futhi benze isiphakamiso sokuthi iKhasimende lisidlulisele kumeluleki wezezikweleti isivumelwano sokubolekwa imali, noma-ke kwisisebenzi esengamele ukuxazululwa kwemibango, kwinkantolo yabathengi noma kwisikhulu esiphenya izikhalazo zabathengi esigunyaziwe, ngenhloso yokuthi labo abasayinde isivumelwano basombulule nanoma imuphi umbango okhona phakathi kwabo ngaphansi kwesivumelwano noma benze futhi bavumelane ngohlelo lokukhokhwa kwemali esalele emuva.
12.2 Uma iKhasimende lihlulekile ukukhokha imali esalele emuva kwaze kwadlula okungenani izinsuku zokusebenza ezingama-20 (amashumi amabili) futhi sekudlule okungenani izinsuku zokusebenza eziyi-10 (ishumi) emva kokuthi abakwa-Homechoice bethumelele iKhasimende isaziso futhi iKhasimende lihluleka ukuthatha izinyathelo ezifanele mayelana nesaziso, noma uma lisichithile isiphakamiso sabakwa-Homechoice, abakwa-HomeChoice kungenzeka baye enkantolo ukuze bathole umyalelo wokuphoqelela ukulandelwa kwesivumelwano;
12.3 IKhasimende livumelekile ukuthi, noma nini ngaphambi kokuthi abakwa-HomeChoice basiqede isivumelwano, lisivuselele isivumelwano esinemali esalele emuva ngokukhokhela abakwa-HomeChoice yonke imali esalele emuva, kuhlangene nemali yezindleko ezikhokhelwa isikweleti esisalele emuva evumelekile okumele ikhokhelwe abakwa- HomeChoice kanye nezindleko ezifanele zokuphoqelela ukulandelwa kwesivumelwano kuze kufike esikhathini sokuvuselelwa kwesivumelwano.
12.4 Uma kwenzeka iKhasimende:
12.4.1 linikeze isitatimende noma isethulo esiphathelene nalesi sivumelwano esinemininingwane engelona iqiniso noma mayelana nezindaba zalo eziphathelene nezimali noma mayelana nokuba sesimweni sokwahluleka ngokusemthethweni ukukhokha izikweleti futhi okungakabuyiselwa esimweni esihle; noma
12.4.2 lenza noma liba sesimweni sanoma yini engaphazamisa amalungelo abakwa-HomeChoice ngaphansi kwalesi sivumelwano;
abakwa-HomeChoice banelungelo lokuthi ngaphandle kokuthumelela iKhasimende esinye isaziso futhi ngaphandle kokuphazamisa amanye amalungelo kodwa ngokulandela izimiso zoMthetho, baqoke ukusiqeda lesi sivumelwano, balande izimpahla ebezithengiwe futhi bafake isicelo sokunxephezelwa ngokulahlekelwa kwabo, futhi bafune ukukhokhelwa yonke imali engakakhokhwa nakuba leyo mali bekungakadingeki ukuthi ikhokhwe ngaleso sikhathi sokuqedwa kwesivumelwano.

13. Ukukhokhwa kwesikweleti ngokugcwele ngaphambi kokuphela kwesikhathi sesivumelwano
13.1 IKhasimende linelungelo lokukhokha ngokugcwele noma nini yonke imali esele ngaphansi kwesivumelwano sokuthenga ngesikweleti, lokho kungenziwa emva kokunikeza isaziso kusenesikhathi noma kwenziwe ngaphandle kokunikeza isaziso.
13.2 Uma iKhasimende lifuna ukukhokha ngokugcwele yonke imali esele ngaphambi kosuku olunqunyiwe, lingabacela abakwa-HomeChoice ukuthi balihlinzeke ngesamba semali okumele ikhokhwe ukuze kukhokhelwe isikweleti ngokugcwele ngaphambi kwesikhathi esinqunyiwe,  futhi leyo mali ibalwa ngokubona kwabakwa-HomeChoice futhi kubhekwa nanoma iziphi izindleko ekukhulunywa ngazo kumshwana 8 kodwa lokho kuzoya ngokwezimiso zoMthetho. Uma iKhasimende linquma ukukhokha le mali ekhulunywa ngayo yokukhokhela isikweleti ngokugcwele ngaphambi kwesikhathi esinqunyiwe, kumele liqinisekise ukuthi leyo mali ifinyelela kwabakwa-HomeChoice ngaphambi kosuku lokukhishwa kwesitatimende se-invoyisi elandelayo.

14. Izitatimende ezithunyelwa nyanga zonke
Abakwa-HomeChoice bazothumelela iKhasimende njalo ngenyanga izitatimende ngeposi noma nge-imeyili futhi lezo zitatimende zizokhombisa inali eliphelele lemali esele ngosuku okukhishwe ngalo isitatimende, okumele ikhokhwe yiKhasimende.

15. Ukubuyiselwa kwezimpahla emuva
IKhasimende linelungelo lokubhalela abakwa-HomeChoice libanikeze isaziso sokuqeda isivumelwano futhi libuyisele emuva izimpahla, ezithengwe ngokwesivumelwano, kwindawo abakwa-HomeChoice abenzela kuyona ibhizinisi kungakapheli izinsuku zokusebenza ezi-5 (ezinhlanu) emva kokuthumela isaziso esibhalwe phansi noma kungakapheli isikhathi okuzovunyelwana ngaso nabakwa-HomeChoice. Izindleko zokubuyiselwa kwezimpahla kwabakwa-HomeChoice zizothwala yiKhasimende. Kungakapheli izinsuku zokusebenza eziyi-10 (eziyishumi) emva kokuthi abakwa-HomeChoice besitholile isaziso esibhalwe phansi noma emva kokufinyelela kwezimpahla kubona, abakwa-Homechoice bazonikeza iKhasimende isaziso esibhalwe phansi esiyisilinganiso senani lezimpahla. Ngaphandle uma kusalele emuva ukukhokha kweKhasimende, lingasihoxisa isaziso sokuqeda isivumelwano futhi liqhubeke nokuba ngumnikazi wezimpahla. Izindleko zokuthunyelwa kwezimpahla emuva kwiKhasimende zizothwalwa yiKhasimende.

Uma ukukhokha kweKhasimende kusalele emuva noma uma lingazithathi izinyathelo ezifanele emva kokuthola isaziso, abakwa-HomeChoice kumele bazidayise izimpahla ukuze babuyelwe yimali yabo.

Emva kokudayisa izimpahla nokuthi bafake imali abayitholile kwi-akhawunti yeKhasimende, sebedonse  imali yezindleko zokudayiswa kwezimpahla kanye nezinye izindleko ezivumelekile, abakwa-HomeChoice bazobhalela iKhasimende balazise ngemali esasele okumele ikhokhwe yiKhasimende (uma ikhona) futhi bafune ukukhokhelwa le mali. Inzalo izokhokhwa yiKhasimende ngokwezinga elihambelana nesivumelwano sokubolekwa imali kuleyo mali esele efunwa ngabakwa-HomeChoice kusukela ngosuku abakhiphe ngalo isaziso sokuthi bayayifuna kuze kufike isikhathi sokukhokhwa kwaleyo mali. Isivumelwano sizoqedwa uma sekukhokhwe isamba semali esele kanye nenzalo.

16. Izindlela zokukhangisa, iKhasimende elingazikhethela kuzona
Abakwa-HomeChoice bazonikeza/sebelinikezile iKhasimende ithuba lokuzikhethela okunye kwalokhu okulandelayo:
– ukungafakwa kwimikhankaso eyenziwayo yokukhangisa izimpahla ngokushayela abathengi ucingo okuzokwenziwa ngabakwa-HomeChoice noma kwenziwe egameni labo;
– ukungafakwa ohlwini lokukhangisa noma lwamakhasimende oluzodayiswa noma lusatshalaliswe ngabakwa-HomeChoice;
– ukungafakwa ezinhlelweni zokuthunyelwa kwemilayezo ye-imeyili noma yama-sms ethunyelelwa abantu abaningi.
AmaKhasimende anelungelo noma nini lokuxhumana nabakwa-HomeChoice futhi acele ukuthi kuchitshiyelwe lokho okukhethwe yiKhasimende.

17. Imihlomulo ye-HomeChoice Plus
Ukuze i-akhawunti yeKhasimende ibuyiselwe esimweni esifanele ngokwemigomo yohlelo lokubala lwabakwa-HomeChoice, abakwa-HomeChoice bayathembisa ukuthi bazokuhoxisa ukukhokwa kwemali ekweletwayo efinyelela kwisamba esingu R2 500 uma kwenzeka likhubazeka unomphela iKhasimende noma lishona.

Imihlomulo ye-HomeChoice Plus izoya ngokwesimo se-akhawunti yeKhasimende futhi kungenzeka iguquke noma nini ngaphandle kwesaziso.

18. Okujwayelekile
Akunakuguqulwa, kushintshwe, kuchitshiyelwe noma kwengezwe noma kwesulwe izingxenye ezithile zale migomo kanye nemibandela okuzosebenza ngokusemthethweni ngaphandle uma kubhalwe phansi futhi kwasayindwa yibona bobabili labo abenze isivumelwano.

Akunasibonelelo sozwelo esizonikezwa ngabakwa-HomeChoice esizothathwa njengokubeka eceleni kwabakwa-HomeChoice kwanoma imaphi amalungelo abo mayelana nalesi sivumelwano. IKhasimende alivumelekile ukuthi lidlulisele komunye umuntu amalungelo alo ngaphansi kwalesi sivumelwano ngaphandle kokuqala ngokuthola imvume ebhalwe phansi yabakwa-HomeChoice.

IKhasimende liyakwamukela ukusebenza kwenkantolo kamantshi enamandla okusebenza phezu komuntu mayelana nezinyathelo zomthetho eziphathelene nalesi sivumelwano nakuba udaba lwenani lemali ebangwayo kungenzeka lube ngaphezu kwamandla okusebenza kwenkantolo kamantshi.

Abakwa-HomeChoice bayinkampani ehlinzeka ngosizo egunyaziwe ngokwemithetho ye-FAIS. Lesi sivumelwano sizolawulwa ngokwemithetho yaseNingizimu Afrika.